જલપરીઓનો ગરબો
જલપરીઓનું એવું, બાઇ જલપરીઓનું એવું:
ફરરર ફરરર તરવું, જાણે દરિયાનું પારેવું!
એક જલપરી વડવાનલની સ્મ્રુતિઓ જેવું હસતી
કદીક, એકલ રાતોમાં આંખેથી મોતી ઝરતી.
જલપરીઓનું એવું, બાઇ--
બિનવિશ્વાસુ, પીળી જલપરી, રાતના સાડા બારે
જુદા જુદા કોળી જવાનનાં સમણાંઓ શણગારે!
જલપરીઓનું એવું, બાઇ--
અળગી થ ઇ ટોળાથી, લીલી પરી વિચારે છાનું:
’શું છે આ દરિયો ને ટોળું? શું છે આ તરવાનું?’
જલપરીઓનું એવું, બાઇ--
છીપલું સમજી, તળિયે એણે નાખી દીધું જેને,
હતું રતન અણમોલ - એટલું સોનપરીને કહે ને !
જલપરીઓનું એવું, બાઇ--
શિશુવ્રુંદને જણે, તરે, ને પરપોટાથી ખેલે..
એક જલપરી આવી રીતે જીવનને સંકેલે !
જલપરીઓનું એવું, બાઇ--
સુંદર પરીઓ ચાલી, સમદરતટ પર રમવા ગરબો,
વ્રુધ્ધ પરીના હ્રદયે, રૂમઝૂમ રાતે, સહેજ ઉઝરડો..
જલપરીઓનું એવું, બાઇ--
શ્વેત પરીને નદી-ડુંગરો જોવાના બહુ કોડ..
ચાલ, જલપરી ! જોવી હો દુનિયા, તો દરિયો છોડું !
ફરરર ફરરર તરવું, જાણે દરિયાનું પારેવું!
જલપરીઓનું એવું, બાઇ જલપરીઓનું એવું.
Some more poems of Udayan Thakkar on Dhaval Shah's Website:
એક પ્રશ્નપત્ર
જોયા છે
કોઈ હથોડી છે?
મથુરાદાસ જેરામ -1, 2 and 3